Steina Vasulka er frumkvöðull á sviði vídeólistar, og hefur með ævilöngu starfi sínu spilað lykilhlutverk í þróun og umbyltingu miðilsins. Hún hóf feril sinn sem klassískt menntaður fiðluleikari, en hún stofnaði The Kitchen í New York árið 1971 ásamt eiginmanni sínum Woody Vasulka og rannsökuðu þau meðal annars eiginleika rafrænna boða og gagnvirkni hljóðs og myndar. Tilraunakennd aðferðafræði þeirra og smíði á tækjum á tólum til vídeógerðar hafa mótað listasöguna og veitt kynslóðum listamanna sem fylgdu í fótspor þeirra innblástur, auk þess sem verk þeirra má finna í mörgum af helstu listasöfnum heims.