Kristján Steingrímur málar með litum gerðum úr steinefnum sem eru sóttir til staða á jörðinni og eru, eða hafa verið manninum mikilvægir. Jarðefnin eru möluð þar til þau verða að litadufti sem í er blandað bindiefni. Þessi aðferð hefur verið notuð öldum saman við að búa til liti fyrir listamenn. Málverkin eru efnisleg staðfesting á tilveru staða og áminning um að þeir eru jafnframt huglægir og háðir upplifun. Verkin endurspegla þá staðreynd að líf á jörðinni endar sem jarðvegur, verður á þann hátt nokkurs konar gagnagrunnur um tilvist okkar. Þannig skráir tíminn söguna í efnið og um leið atferli mannsins og samband hans við náttúruna.