Hulda Stefánsdóttir hefur á ferli sínum skapað yfirgripsmikla heild einstakra verka í gegnum rannsóknir sínar á eiginleikum málverksins sem miðli, samhengi þess og eðlisþáttum. Lifandi og margbreytileg framsetning gegnir veigamiklu hlutverki innan heildarupplifunar á verkum hennar, þar sem hún stillir þeim oftar en ekki upp í fylkingum sem falla að arkitektúr rýmisins hverju sinni. Verk hennar spretta úr lind innsæis og listrænnar samfellu, svo úr verður marglaga samspil efnislegrar upplifunar og minninga.