Þórdís Erla Zoëga hefur verið valin til að sýna í Auglýsingahléi Billboard 2026 en Billboard rekur auglýsingaskjái í strætóskýlum og víða á höfuðborgarsvæðinu.

Billbord efndi í haust til opinnar samkeppni um myndlistarverk í almenningsrými í samstarfi við Listasafn Reykjavíkur og Y gallery og verk Þórdísar Erlu „Sólarhringur“ var hlutskarpast.

„Fyrstu dagana í janúar 2026 verður Auglýsingahlé á yfir 500 stafrænum flötum Billboard um allt höfuðborgarsvæðið. Þessi tími verður helgaður sýningu á nýju verki eftir Þórdísi Erlu Zoëga sem valin var úr stórum hópi umsækjenda. Valnefnd var skipuð skipuð fulltrúum frá Listasafni Reykjavíkur, Y galleríi og SÍM,“ er haft eftir tilkynningu.

„Verk Þórdísar ,,Sólarhringur” hvetur til nýrrar hugsunar um samband manns, tækni og náttúru. Það leggur til að skjáir í borgarrými breytist með birtu dagsins og taki mið af litbrigðum sólarljóssins og áhrifum þess á himinhvolfið. Þannig verður stafræni skjárinn að sólarklukku sem sýnir takt lífsins, þar sem líftími frumunnar fylgir ljósaskiptum sólarhringsins í rauntíma,“ segir um verkið.

Við hvetjum borgarbúa til þess að fylgjast með verkinu á skjám höfuðborgarinnar frá og með 1. janúar 2026 og óskum Þórdísi Erlu til hamingju.