Blómstrandi Framtíð er titill nýrrar einkasýningar Katrínar Elvarsdóttur sem opnar þann 23. janúar 2026 í Hafnarhúsi, Listasafni Reykjavíkur.

Í sýningunni beinir Katrín sjónum sínum að plöntum sem hafa ferðast milli heimkynna.
Í forgrunni eru þrjár plöntutegundir – kirsuberjatré, bananatré og fenjagreni – sem hver um sig býr yfir langri og áhugaverðri sögu sem tengir saman ólíkar heimsálfur.
Katrín eltir þær með myndavélinni – ekki til að festa þær niður, heldur til að skrá þær og færa þær yfir í annað form. Í myndinni tilheyra þær enn öðrum heimi, þeim sem Katrín skapar. Þær bera vitni um eitthvað sem flyst en gleymist ekki og þess sem getur blómstrað – jafnvel langt frá uppruna sínum.

Auga myndavélarlinsunnar fangar afmarkað umhverfi á örskotsstund en Katrín Elvarsdóttir skrásetur um leið sögu, menningu og náttúru sem nær aldir aftur í tímann og spannar ólík heimshorn. Viðfangsefni nýjustu verka hennar er kvikur heimur hugmynda og upplýsinga sem flæða um veröldina og draga fram togstreitu á milli fjölbreytileika og einsleitni. Verk sín setur hún fram með margslunginni eftirvinnslu, ýmist í kjarna myndarinnar sjálfrar eða efnisvali, sem eykur enn á lagskiptingu þeirrar upplifunar sem hún ber á borð áhorfenda.

Sýningarstjóri er Bryndís Erla Hjálmarsdóttir. Katrín gaf nýverið út bókverk sem ber sama titil og sýningin, en hún gefur greinargóða innsýn inn í ferli listamannsins.